Gorffennaf 2026 

Ym mis Medi eleni, lansir fersiwn Gymraeg o Sumdog, llwyfan mathemateg ar-lein a ddefnyddir gan lu o ddisgyblion ysgolion cynradd Cymru.  Ar hyn o bryd, adnodd Saesneg yn unig yw Sumdog, ond mae'n braf gwybod y bydd pethau'n newid ym mis Medi.  

Dyma fydd y ddarpariaeth gyntaf o'i bath i addasu i lefel pob disgybl, i gyd-fynd yn llawn â Maes Dysgu a Phrofiad Mathemateg a Rhifedd Cwricwlwm i Gymru, ac i fod ar gael yn gyfan gwbl yn y Gymraeg. 

Gan gofio fod gwella safonau rhifedd yn un o flaenoriaethau addysgol cyfredol Cymru, edrychwn ymlaen at weld yr adnodd cyfrwng Cymraeg hwn.  Mae'r fersiwn Gymraeg yn cynnwys mwy na 200,000 o gwestiynau mathemateg a chynnwys cysylltiedig.  Cafodd ei datblygu gan athrawon cyfrwng Cymraeg a'i sicrhau o ran ansawdd gan adolygydd iaith Gymraeg. 

Byddai Rhidian James, Rheolwr Prosiect Cyfieithu Cymraeg Sumdog, yn croesawu'r cyfle i drafod yr adnodd, rhannu'r dystiolaeth a chlywed barn ymarferwyr ac ymgynghorwyr ar draws y sector addysg yng Nghymru.  

Os hoffech gael rhagor o wybodaeth am yr adnodd newydd hwn, neu os ydych yn awyddus i gofrestru eich diddordeb, ewch i: 

https://learn.sumdog.com/en-gb/schools/curriculum-coverage/curriculum-for-wales-alignment

Mehefin 24ain, 2026 

Yn wyneb y gwres llethol, rydym yn deall ac yn annog yr angen i ystyried a dilyn trefniadau gwahanol i’r arfer.  Mae sefyllfa pob ysgol yn wahanol, ond mae’n bwysig bod camau pendant yn cael eu cymryd i asesu’r risg i’r gweithlu ac i ddysgwyr.   Rhaid bod yn ofalus a gofalgar o bob unigolyn yr ysgol, gan roi sylw dyledus ac arbennig i’r carfannau hynny y bydd y gwres yn effeithio fwyaf arnynt.    O fod wedi asesu’r risg, yna mae’n bwysig bod y camau priodol yn cael eu cymryd o fewn ysgolion, gan addasu trefn diwrnod, gofynion gwisg a gweithgareddau yn ôl yr angen.  Os nad yw’r asesiad risg yn gallu gwarantu diogelwch staff a disgyblion, yna rhaid derbyn fod yr ysgol yn wynebu’r penderfyniad anochel o gau’r ysgol.   Mae’n bwysig bod pob aelod o’r gweithlu a phob dysgwr yn gweithio mewn awyrgylch diogel.

Mehefin 17eg, 2026 

YMATEB UCAC I DDATGANIAD Y GWEINIDOG DROS ADDYSG 

Mae UCAC yn croesawu datganiad y Gweinidog dros Addysg a’r Gymraeg, Anna Brychan, ddoe y bydd y Llywodraeth yn cyhoeddi ‘disgwyliadau Cenedlaethol clir ar sut mae ffonau symudol yn cael eu defnyddio mewn ysgolion. ‘ Edrychwn ymlaen at weld y canllawiau ac at y cyfle o ymateb i ymgynghoriad a gynhelir ym mis Medi. Rydym yn falch fod y Gweinidog wedi nodi y bydd y canllaw statudol yn cynnig disgwyliadau clir.  Mae eglurder a chysondeb cenedlaethol yn hollbwysig yn ein barn ni.  Yn ddi-os gall ffonau symudol greu problem mewn ysgolion ac mae hyn yn creu gwaith ychwanegol i staff ysgolion sy’n gorfod delio gyda chanlyniadau defnydd amhriodol. Mae’n bwysig bod athrawon yn cael y cyfle i ganolbwyntio ar eu priod waith, sef addysgu. 

Rydym eisoes yn ymwybodol o rai cynlluniau sydd ar waith mewn ysgolion i gyfyngu ar y defnydd o ffonau symudol yn ystod y diwrnod ysgol.  Mae ein haelodau wedi cyfeirio at ganlyniadau cadarnhaol hyn, gyda disgyblion yn siarad mwy â’i gilydd ac yn ymroi i weithgareddau eraill yn hytrach na bod ynghlwm wrth eu sgriniau ffôn.  Rydym hefyd yn ymwybodol bod angen sensitifrwydd i ofynion rhai dysgwyr sy’n gorfod cael mynediad at eu ffonau oherwydd cyflyrau meddygol. 

Edrychwn ymlaen at drafodaeth bellach am y maes hwn gyda’r Llywodraeth yn ystod yr wythnosau a’r  misoedd nesaf.  Rydym yn awyddus i wneud y gorau dros staff ein hysgolion a chreu amgylchedd dysgu ddiogel i’n dysgwyr. 

Mehefin 15fed, 2026 

Mae gan UCAC gyfres o daflenni gwybodaeth am nifer o faterion perthnasol i athrawon.  Maent yn cael eu diweddaru'n gyson, er mwyn adlewyrchu newidiadau o ran y Ddogfen Cyflog ac Amodau Athrawon Ysgol (Cymru) a deddfau perthnasol.  Mae taflen wybodaeth UCAC ar Amodau Gwaith Athrawon wedi ei diweddaru i gydfynd â'r Ddogfen Cyflog ac Amodau Athrawon Ysgol (Cymru) 2025/2026 (fersiwn Mawrth 2026).    Mae'r daflen hon yn cynnig atebion i gyfres o ddeuddeg cwestiwn: 

1. Beth all Pennaeth ddisgwyl i athrawon yr ysgol wneud? 

2. A oes hawl disgwyl i athrawon fynychu cyfarfodydd ar ôl oriau ysgol? 

3. Beth am staff rhan amser yn mynychu cyfarfodydd? 

4. Beth all Pennaeth ac aelodau'r Tîm Rheoli neu Bennaeth Gwasanaeth ALl) ei wneud er myn sicrhau bod pob athron yn derbyn hawliau cytundebol y Ddogfen? 

5. A oes gan benaethiaid, dirprwyon a phenaethiaid cynorthwyol hawliau eraill? 

6. Sawl gwaith y gellir disgwyl i athrawon baratoi adroddiadau ysgrifenedig ar berfformiad disgyblion ar gyfer rhieni? 

7. A oes hawl disgwyl i athro gymryd cyfrifoldeb ac atebolrwydd am bwnc heb dderbyn cydnabyddiaeth ariannol? 

8. A oes hawl disgwyl i athro gyda chyfrifoldeb rheoli neu arwain gyflawni'r gwaith heb amser digyswllt yn ychwanegol at yr amser Cynllunio, Paratoi ac Asesu? 

9. Beth am ymateb i negeseuon e-bost ar ôl oriau ysgol? 

10. Arolwg Estyn

11. Beth am drefniadau Adolygu Dysgu Proffesiynol (yr hyn a elwid gynt yn Rheoli Perfformiad)? 

12. Beth am weithgareddau gwirfoddol, megis arwain clybiau ar ôl ysgol, paratoi disgyblion am gyngerdd ysgol, cynnal gwers adolygu ar ôl ysgol, gwneud dyletswydd cinio, cynnal clybiau amser cinio? 

Er mwyn cael ateb i'r deuddeg cwestiwn uchod, ewch i: 

2026_Amodau_Gwaith_Athrawon.pdf

Mae'r wybodaeth yn y daflen uchod wedi'i seilio ar y Ddogfen Cyflog ac Amodau isod: 

Dogfen Cyflog ac Amodau Athrawon Ysgol (Cymru) 2025/26 a chanllawiau ar gyflog ac amodau athrawon ysgol – Mawrth 2026

Mehefin 9fed, 2026 

Swyddog Cyllid - rhan amser 0.4 

Mae UCAC yn chwilio am berson profiadol, brwdfrydig a medrus i ymuno â'n tîm gweithgar: 

Prif waith y Swyddog Cyllid fydd:

• Monitro a gweinyddu materion cyllid yr Undeb 
• Paratoi adroddiadau i ddiben cynllunio

Cyflog cychwynnol y swydd: £33.118 pro rata (sef £13,684)

Ceir ffurflen gais, disgrifiad swydd a manylion pellach yma

Dyddiad cau: Mehefin 29ain, 2026 am 1yp 

Cyfweliadau: Gorffennaf 3ydd, 2026