Mai 2025

Mae hi’n Wythnos Ymwybyddiaeth Iechyd Meddwl.  Mae hi’n bwysig ein bod yn gofalu amdanom ein hunain yn gorfforol ac yn feddyliol.  Cofiwch fod UCAC ac Education  Support bob amser yn barod i’ch helpu.  Dyma becyn cymorth dwyieithog gan Education Support – beth am fwrw golwg arno: Dolen

Mai 2025

Mae UCAC yn cynrychioli athrawon,  darlithwyr ac arweinwyr addysg ym mhob cwr o Gymru.  

Rydym yn awyddus i benodi ymddiriedolwyr newydd i gyfrannu at lywodraethiant yr Undeb. Mae croeso i unrhyw aelod neu gyn-aelod fynegi diddordeb, a’r Cyngor Cenedlaethol fydd yn penodi’n derfynol. 

Prif rôl Ymddiriedolwyr UCAC yw llywodraethu a rheoli asedau’r Undeb:  

• Gwarchod holl fuddsoddiadau’r Undeb, a derbyn cyngor gan yr ymgynghorwyr ariannol perthnasol
• Bod yn gyfrifol am eiddo’r Undeb, gan sicrhau fod anghenion iechyd a diogelwch yn cael eu diwallu a sicrhau bod yr eiddo yn cael ei gadw’n safonol. 
• Sicrhau bod Cynllun Pensiwn UCAC yn cael ei weinyddu’n effeithiol ac yn gywir gydag arweiniad arbenigwyr.

Mae’n gyfrifoldeb cyffredinol ar yr Ymddiriedolwyr i sicrhau gwytnwch yr Undeb a disgwylir iddynt gyfrannu at drafodaethau yn ymwneud â chyllid a datblygiad UCAC.

Disgwylir i Ymddiriedolwyr fod ar gael i gyfarfod o leiaf dair gwaith y flwyddyn. 

Disgwylir i ymddiriedolwyr wasanaethu am dymor o dair blynedd, ond mae modd gwasanaethu am sawl tymor yn ddilynol.  

Nid oes tâl i’r rôl hon, ond cynigir costau teithio. 

Os oes diddordeb gennych i ymgymryd â’r rôl, cysylltwch â Ioan Rhys Jones, Ysgrifennydd Cyffredinol UCAC Mae'r cyfeiriad e-bost hwn wedi'i warchod rhag robotiaid sbam. Rhaid i chi alluogi JavaScript i'w weld. am sgwrs neu i fynegi diddordeb (erbyn Mehefin 30ain) gan roi crynodeb o’ch gyrfa ac amlinelliad yn egluro eich diddordeb. 

Mai 2025 

Mae Race Council Cymru yn falch o gyhoeddi bod ceisiadau nawr ar agor ar gyfer Grant Windrush 2025. Mae'r grant hwn yn cefnogi sefydliadau yng Nghymru i ddarparu digwyddiadau a gweithgareddau i ddathlu cyfraniadau’r Genhedlaeth Windrush. Mae modd cael hyd at £1,500 i gefnogi eich prosiect.  Er mwyn cael gwybodaeth bellach a ffurflen gais, ewch i:

https://racecouncilcymru.org.uk/national-windrush-day-2025-windrush-cymru-77-grant-application

Peidiwch ag oedi - mae ceisiadau'n cau ar 11 Mai, 2025

Ebrill 2025 

Mae Pwyllgor Plant, Pobl Ifanc ac Addysg Senedd Cymru yn cynnal ymchwiliad i Recriwtio a Chadw Athrawon yng Nghymru. Gofynnwn yn garedig am eich cefnogaeth i gwblhau'r arolwg hwn er mwyn iddynt allu casglu gwybodaeth werthfawr ynglŷn â sut mae recriwtio a chadw staff yn effeithio ar athrawon a disgyblion. 

Er mwyn llenwi'r holiadur, dilynwch y ddolen isod: 

Ymholiad Recriwtio a Chadw Athrawon

Os oes angen i chi dderbyn yr arolwg mewn fformat hygyrch, neu os oes gennych unrhyw gwestiynau pellach, e-bostiwch Mae'r cyfeiriad e-bost hwn wedi'i warchod rhag robotiaid sbam. Rhaid i chi alluogi JavaScript i'w weld.

Ebrill 2025 

PROSIECT ADNABOD GEIRFA GRAIDD PLANT OEDRAN 7-11 OED 

 Mae’r Ganolfan Dysgu Cymraeg Genedlaethol yn comisiynu darn o waith ymchwil er mwyn adnabod geirfa graidd plant rhwng 7 ac 11 mlwydd oed. Y bwriad yw casglu geirfa y mae dysgwyr blwyddyn 3 hyd at flwyddyn 6 yn debygol o’u defnyddio’n rheolaidd ac sydd angen iddyn nhw fod yn ymwybodol ohonynt wrth iddyn nhw ddysgu a defnyddio’r Gymraeg yn eu hysgolion ac yn gymdeithasolMaent yn chwilio am grŵp cynrychioladol o athrawon i fod yn rhan o’r ymchwil hwn. Bydd tâl i bob unigolyn sy’n cymryd rhan yn y prosiect.

 Ydych chi’n gweithio yn un o’r sectorau canlynol?

• Athro mewn Ysgol Gynradd Cyfrwng Cymraeg
• Athro mewn Ysgol Gynradd Dwy iaith/Iaith Ddeuol
• Athro sydd yn gallu siarad Cymraeg hyd at lefel B1 Canolradd mewn Ysgol Gynradd Cyfrwng Saesneg
• Athro sy’n siarad Cymraeg mewn Ysgol Gynradd Ddwyieithog
• Athro mewn Uned/Gwasanaeth Trochi Sector Cynradd
• Athro yn y Sector Cynradd sydd wedi dilyn y Cynllun Sabothol
• Uwch gymhorthydd (CALU/HLTA)
• Athro bro/athro Sector Cynradd sy’n cefnogi’r Gymraeg

 Beth yw’r gofynion o ran amser?

 Bydd angen i chi roi 4 awr o’ch amser eich hun, y tu hwnt i oriau ysgol dros gyfnod o ddau ddiwrnod.

Cynhelir y ddwy sesiwn ar y dyddiadau canlynol:

Dydd Mercher , y 4ydd o Fehefin, 2025 4.30pm tan 6.30

Dydd Iau, y 5ed o Fehefin, 2025 4.30pm tan 6.30pm

 Noder bod rhaid i chi fynychu’r ddwy sesiwn a thelir  tâl o £150 am eich amser a’ch mewnbwn wedi’r ddwy sesiwn

 Beth sydd angen i chi wneud?

Bydd academyddion Prifysgol Abertawe yn eich arwain drwy’r sesiynau ar lein (Teams) ble bydd gofyn i chi feddwl am gasgliad o eiriau sy’n gysylltiedig â chategoriau penodol yng nghyd-destun bywyd plentyn e.e.

’meddyliwch am 20 gair hanfodol y byddech yn eu cysylltu gyda’r categori chwarae’.

Disgwylir i chi gyflwyno’r geiriau ar ffurf google form, yn y fan a’r lle cyn symud ymlaen at y categori nesaf. Ni fydd gwaith ychwanegol wedi’r cyfarfodydd ar lein a bydd cyfarwyddyd clir yn cael ei roi i chi i’ch arwain drwy’r dasg.

 Sut mae cofrestru?

 Os oes gennych ddiddordeb y dyddiad cau ar gyfer cwblhau’r google form isod yw dydd Llun 12fed o Fai, 2025.  Bydd rhaid i ni weithredu ar yr  egwyddor cyntaf i’r felin os ceir gormod o geisiadau.

 https://forms.gle/BTn3NCRSArdsmczs5 

 Cynhelir y sesiynau trwy gyfrwng y Gymraeg.