22 Rhagfyr 2020 

Rwy’n mawr obeithio eich bod yn cadw’n ddiogel ac iach ac yn cael rhywfaint o egwyl dros gyfnod yw ŵyl.

Mae rhai aelodau wedi cysylltu i fynegi pryder am fis Ionawr gydag ymddangosiad y straen newydd o Covid-19 ym mhob rhan o Gymru. Roeddwn am eich hysbysu y bydd UCAC yn cyfarfod gyda Llywodraeth Cymru yn ystod y gwyliau ac yn ymateb i bob gohebiaeth ganddynt.

Yn ogystal rydym wedi derbyn datganiad ysgrifenedig heddiw gan Lywodraeth Cymru sy’n son am y rheini sydd yn eithriadol o agored i niwed yn glinigol – sef y grŵp hwnnw o bobl a oedd yn gwarchod (shielding) yn flaenorol.  Mae’r cyngor yn nodi na ddylai’r unigolion yma fynychu safleoedd gwaith tu allan i’r cartref.

11 Rhagfyr 2020 

Mae UCAC yn croesawu penderfyniad Llywodraeth Cymru  i symud ysgolion uwchradd a cholegau Cymru i ddysgu ar-lein o ddydd Llun, 14 Rhagfyr ymlaen fel rhan o’r 'ymdrech genedlaethol i atal trosglwyddo’r coronafeirws'. Mae’n benderfyniad doeth sy’n ymateb i’r pryderon sydd wedi eu codi gan UCAC ac yn ymateb i gyngor y Prif Swyddog Meddygol.

Fodd bynnag, rydym yn siomedig nad oedd penderfyniad cyffelyb wedi ei wneud ar lefel cenedlaethol ar gyfer y sector cynradd. canlyniad hynny yw anghysondebau ac ansicrwydd ar draws Cymru o ran trefniadau gan awdurdodau lleol.

03 Rhagfyr 2020 

Ymehllach i’r llythyr a anfonwyd gan UCAC at y Gweinidog Addysg am drefniadau diwedd y tymor dyma ei hymateb - Ymateb Y Gweinidog Addysg

25 Tachwedd 2020 

Mae undeb addysg UCAC wedi ysgrifennu at Gweinidog Addysg heddiw i ofyn iddi ystyried pa opsiynau sydd ar gael i leihau’r risgiau o ddisgyblion a staff yn gorfod hunan-ynysu dros y Nadolig. Un opsiwn fyddai cau safleoedd ysgolion a cholegau addysg bellach ar ddydd Gwener 11 Rhagfyr gan sicrhau dysgu-o-bell ar gyfer wythnos ola’r tymor.

Dywedodd Dilwyn Roberts-Young, Ysgrifennydd Cyffredinol UCAC “Mae aelodau UCAC wedi ymateb i holiadur dros y penwythnos â 75% o’r ymatebion o blaid dysgu-o-bell ar gyfer wythnos ola’r tymor cyn y Nadolig, er mwyn diogelu dysgwyr a staff.

10 Tachwedd 2020 

Mae undeb addysg UCAC wedi croesawu penderfyniad y Gweinidog Addysg heddiw i ganslo arholiadau allanol ar gyfer TGAU, Uwch Gyfrannol a Safon Uwch yn ystod haf 2021, ac i roi trefniadau asesu amgen yn eu lle.

Dywedodd Rebecca Williams, Is-ysgrifennydd Cyffredinol a Swyddog Polisi UCAC “Bydd y cyhoeddiad hwn yn rhyddhad o’r mwyaf i ysgolion ledled Cymru. Nid oes modd amgyffred cynnal arholiadau allanol mewn modd sy’n rhoi tegwch i ddisgyblion dan yr amgylchiadau presennol ac nid oes unrhyw sicrwydd y bydd yr amodau’n caniatáu hynny yn yr haf.

“Mae’r penderfyniad hwn yn golygu y bydd trefniadau amgen yn eu lle ac na fydd angen gwneud newidiadau disymwth, funud olaf, ac mae hynny i’w groesawu’n fawr iawn.